تخلف الشعب الفرنسي
( فضفضة بالعامية )
بدي أحكيلكو حكاية عن الشعب الفرنسي قديش متخلف ..
رغم انو درسنا وشفنا بالتلفزيون وسمعنا انه شعب مثقف وواعي ..طلع كله كذب ..
أمانة العاصمة والبلديات والمحافظات عملت للشعب جسور مشاة على الطرق الرئيسية والاتوسترادات ..
وما في يوم إلا وبتسمع فيه عن حوادث دعس ..
هداك اليوم شفت واحد إسمه #جورج فش بينه وبين جسر المشاة عشر امتار راح قطع الشارع وأجت سيارة مسرعة وخبطته وطيرته عشرين متر في الهوى ..
مسكين الشوفير بفكر انو الشارع للسيارت بس ..بفكرش انو الشارع للمشاه كمان هالمسخمط ..
بعرفوش انو هالمسخم بدو يحط اللي محوشه طول عمره عشان يتجوز على علاج جورج في المستشفى. فوق هيك بتخالف وبنسحب رخصته وبتبهدل..
هو ما شاء الله عنه إبن عز ..بعرفوش إنا بنعرف انو ابوه مات من الرطوبه ..وستو ماتت من مرض فقر الدم ..
وغير هيك بجي أخو جورج وبتف على الشوفير أعزكم الله.. وبقله يا حمار مش شايف الزلمه ..الله لا يوفق الي اعطاك الرخصه ..وبتجي امه بتدعى عليه وبتجي اخته بتسب عليه..
وبدهم جاهات وعطوات واعترافات انو طول ما هو قاعد يتعالج لازم يجبله الفطور كبده وطحل علشان يرم عظمه ويشفى بسرعة.. وعلى الغدا لازم يجيبلو وجبات من #هارديز. او #كنتاكي..
اه ياعمي مهو طول عمره هو واهلو ما بياكلو بالبيت مقدينها على المطاعم .. يعني بنعرفش انو على الفطور بحطوا صحن حمص عليه زيت قلي..وبهجمو عليه وبتقاتلوا مع بعض ازا واحد أكل لقمه زيادة..
هالمسخم الشوفير ما بخلص من علاج جورج الا صارف المصاري الي كان محوشهم عشان يتجوز الليدي سوسو.. وفوق هيك بروح ( يتداين مصاري ) من الي بسوا والي ما بسواش . .وبطلق خطيبته بعد ثلاثه سنين خطبه..
هيك مقدر إلهم عشان يطلعهم جورج بالسحبه ويقطع الشارع ويندعس (يا ريت يحطوا قانون زينا يخالفوا الي بقطع الشارع وبندعس)..
والأدهي من هيك بصور جورج حالو وبحط صورته على الفيس بوك وبكتب..
الرجل الذي ما قدرلوش عزائيل..
شايفين قديش الشعب الفرنسي متخلف..
(يجوا يتعلموا عنا كيف بيقطع شعبنا الشوارع 😂) ..
 بدي أحكيلكو حكاية عن الشعب الفرنسي قديش متخلف .. رغم انو درسنا وشفنا بالتلفزيون وسمعنا انه شعب مثق…){kind=link}
تعليقات
إرسال تعليق
( مَا يَلْفِظُ مِن قَوْلٍ إِلا لَدَيْهِ رَقِيبٌ عَتِيدٌ )
ليكن لك بصمه إترك تعليق وشاركنا برأيك يهمني تعليقاتكم اخوكم في الله ناجح سلهب التميمي بارك الله بكم